Ricette nostrane

 

Cazzilli

Passàti cu un crivu un chilu di patati vugghiuti e dopu avirici ‘miscatu ‘n’anticchia d’agghia sminuzzata, ‘n’anticchia di pitrusinu, sali e pipi, cuminciàti a pripàrari li cazzilli longhi e grossi quanto li vuliti, ma nè cchiu grossi nè cchiù longhi di lu vostru ditu mediu.

Pronti chi sunnu, mittìli a friiri dintra ‘na padedda cu ogghiu di semi vugghienti.

A culuri giustu scinnìti e manciàti.

Si vi fa piacìri, passati li cazzilli dintra lu biancu d’ovu sbattutu e supra lu pani grattatu, comu fannu nni la piana di Catania, e poi friitili.

(2 – continua)

Ricette nostrane

 

Panelli

 

Pari nenti cu lu nenti

e però pi giovi ‘mpisu

cu stu nenti ‘ntra li denti

ti n’acchiani n’paradisu

 

Dintra menzu litru d’acqua salata e fridda jttatici 200 grammi di farina di ciciri e cu ‘na cucchiara di lignu arriminati e arriminati.

Pigghiati la pignata e sempri riminannu faciti cuciri a farina finu a falla ‘ncuddari tutta.

A ‘stu puntu pigghiati n’anticchia di pitrusinu tritatu e siminaticcillu dintra.

Ora scinniti la pignata, pigghiati li forma di lignu fatti apposta e cu ‘na palittedda mittitici supra la pasta e cantiatili ‘sti furmi. a una a una, pi falli arripusari.

Friddi chi sunnu livati li panelli di la furma e jttatili dintra ‘na paredda cu ogghiu di semi bollenti.

Facitili natari ‘ntra l’ogghiu rivutannuli a mumentu giustu e scinnitili cavudi cavudi.

 

 

(1 – continua)